Llandudno oedd y lle i fod ddydd Sadwrn, 7 Tachwedd, wrth i 19 côr o bob rhan o Brydain ac Iwerddon gyrraedd i gystadlu yng Ngŵyl Gorawl Gogledd Cymru 2009.

Ar ôl cystadleuaeth frwd a thrafodaethau dwys cyhoeddwyd mai’r canlynol oedd enillwyr yr adrannau unigol:

Ieuenctid: Côr Ieuenctid Môn
Cymysg: Friday Voices
Merched: Friday Voices
Meibion: Shifnal & District Male Voice Choir

Cafwyd cyngerdd ardderchog gan yr enillwyr gyda’r nos, a thra roedd y beirniaid yn gwneud penderfyniad anoddaf y dydd, cafodd y gynulleidfa adloniant gan enillydd Cân i Gymru, Elfed Morgan Morris.

Ond, roedd rhaid penderfynu ar un enillydd, a chyhoeddodd yr arweinydd, Dilwyn Morgan mai’r enillwyr eleni oedd Côr Cymysg Friday Voices. Roeddent yn falch iawn o gael derbyn tlws yr enillwyr, yn ogystal â’r wobr ariannol.

Cadarnhawyd mai dyddiad yr Ŵyl yn 2010 fydd dydd Sadwrn, 6 Tachwedd ac unwaith eto, bydd yn cael ei chynnal yn Venue Cymru, Llandudno.